Autors: Ilga Šuplinska
Avots: Ilga Šuplinska
Jau sastū reizi teik organizāta pusaudžu i jaunīšu nūmetne „Sūpluok”. Sevkuru reizi „Sūpluok” izavielej kaidu atškireibu nu īprīškejom nūmetnem. Itūreiz nūmetne nūtiks Adamovā, natuoli nu Kruoslovys, kai arī atslāga vuordi ir latgaliskais pīdzeivuojums animacejā i dobā. Nūmetne nūtiks nu 20. da 27. juļa.
Reklāma
Pusaudžu i jaunīšu nūmetne "Sūpluok" pīduovoj 14–18 godu jaunīšim lītdereigi i izzinūši pietnīcyskuos darbeibuos pavadeit vīnu nedeli gleznainā dobys vītā – Daugovys lūkūs, pi Adamovys dobys tokys. Parosti nūmetne nūtyka Rēzeknis nūvoda Rogovkā, kurys tradicejom boguotuo vide paleidzēja nūmetnis organizatorim radeit naaizmierstamys šaļtenis. Tymā pošā laikā itys gods sūlās byut eipašs, na tikai partū, ka asam pamainejuši nūtikšonys vītu. Bet ari partū, ka vaira uzaturēsim uorā, nūsadorbojūt ar izziņu, pietnīceibu i sportu, taidā veidā nūmetnis nūsaukums byus „Sūpluok dobā”.
Nūmetnis atslāga vuordi – latgaliskais pīdzeivuojums animacejā i dobā, ļaus atkluot sevi interaktivuos nūdarbēs, muzykā i poša ideņtitatei svareiguos vierteibuos. Nūmetnis laikā runuosim par vierteibom i laiku, meklēsim īdvasmu dobā, izmontojūt riteņus, supus, telts i lobu gorastuovūkli, īkuortuosim i izstaiguosim izdzeivuošonys tokys, veiduosim animaceju, pietejūt sovu vierteibu pasauli i apleicīni. Pīvīnuotuo vierteiba – respektēsim dažaidys volūdys, bet padzilinuoti izmontuosim tīši latgaliskū kodu i volūdu.
Komandā ir četri radūši pedagogi: Ilga Šuplinska (animacejis satura, tekstu i viersrokstu, Latgolys kulinarejis i leksikys nūslāpumu atkluojieja), Evika Muizniece (multimuokslineica i žurnaliste, ideņtitatis styprynuošona, radūšī dorbi, sportiskais i deju azarts i nūdarbeibys), Kristaps Višs (muzykis, muzyka, dzīsme, gitarspiele) i Jānis Indāns (muokslinīks, animaceja, veiduošona, tehnologejis). Myus atbaļsteis breineiguo atpyutys vītys komanda.
Pīsateikt nūmetnei var ite: https://forms.gle/y4PWdVGEAN9eP5PQ7 voi nūmetnis FB kontā ite
Vaicuojumim: [email protected], 26451355
Ilga Šuplinska,
nūmetnis vadeituoja
Reklāmas raksts.
Par rakstu pārpublicēšanas noteikumiem lūdzam kontaktēties ar Travelnews.lv redakciju.
